ვიზუალური ეფექტები შრიფტის დიზაინში

დამწყები ტიპოგრაფებისთვის და დიზაინერებისთვის ალბათ ნაცნობია შემთხვევა, როცა დიზაინში ყველა ფორმა გასწორებულია ერთმანეთთან, თუმცა დიზაინი მაინც არ გამოიყურება ჰარმონიულად.

ამის ერთ-ერთი მიზეზია ის, რომ თვალისთვის სხვადასხვა გეომეტრიული ფორმის აღქმა განსხვავდება ერთმანეთისგან: მაგ. კვადრატი იგივე სიმაღლის წრეზე და სამკუთხედზე დიდად გამოიყურება.

შრიფტის დიზაინში ამ და სხვა ვიზუალური ეფექტების დასაბალანსებლად  შეგვიძლია გამოვიყენოთ რამოდენიმე ხერხი: 

01. თუ სიმბოლოს აქვს მომრგვალებული ან წვეტიანი, სამკუთხა კიდეები ოდნავ უნდა სცილდებოდეს სწორი კიდეების ზედა ან ქვედა ზღვარს.

02. ერთი და იგივე სისქის ჰორიზონტალური შტრიხი ვერტიკალურზე სქელად აღიქმება. კომპენსაციისთვის, თუ გვინდა, რომ თანაბრად გამოიყურებოდეს, საჭიროა ჰორიზონტალური შტრიხის სისქე ვერტიკალურზე ოდნავ მცირე იყოს. 

ის ფაქტი, რომ თვალი ჰორიზონტალურ სისქეებს გადაჭარბებულად აღიქვამს, დადასტურებულია ოფიციალური სამედიცინო ბიბლიოთეკის მიერ განთავსებულ კვლევაშიც. 

ეს განსხვავება აშკარად გამოჩნდება, თუ H ასოს გადმოვატრიალებთ - ვერტიკალური და ჰორიზონტალური ხაზების სისქე ბევრად განსხვავებულად აღიქმება.

03. წრიული რკალი ტექსტში ცოტა „დაჭყლეტილად“ გამოიყურება, ამიტომ მრგვალი ფორმის ასოები, როგორც წესი, არ იმეორებს იდეალური წრის ფორმას, უფრო ვიწროა. 

04. სხვადასხვა ფორმის ასოები ვიზუალურად განსხვავებულად აღიქმება, ტექსტში ასოებს შორის ჰარმონიულობის მისაღწევად საჭიროა ასოებს შორის დაშორება (Spaceing & Kerning) სწორად იყოს განსაზღვრული. აქ შეგვიძლია ვიმოქმედოთ ზოგადი პრინციპებით: რაც უფრო მომრგვალებულია სიმბოლოს გვერდითი კიდეები, მით ნაკლები უნდა იყოს მანძილი სხვა სიმბოლოებთან მიმართებაში; 

სამკუთხა ფორმის ასოების გარშემო დიდი სივცრე იქმნება, ამიტომ ისინი კიდევ უფრო ახლოს განლაგდება სხვა ასოებთან.

05. სიმბოლოს ტიპოგრაფიული ოპტიკური ცენტრი, როგორც წესი, გეომეტრიულ ცენტრზე ოდნავ მაღლაა. 

გეომეტრიული ცენტრის ზემოთ აწევა თვალისთვის უფრო კომფორტულად აღსაქმელ კომპოზიციას ქმნის.

ეს და მრავალი სხვა ოპტიკური ილუზიების კომპენსაცია წარმოადგენს ფუნდამენტურ პრინციპებს ფუნქციონალური შრიფტის შექმნისას. ესაა მცირე, მაგრამ მნიშვნელოვანი დეტალები, რისი გათვალისწინებაც დაგეხმარებათ შრიფტის დიზაინისთვის პროფესიონალური და ჰარმონიული ვიზუალური სახის მინიჭებაში.

სტატიის ავტორი:

   მარიამ ჩაჩანიძე

 Facebook     Instagram