MS Pillar - ახალი ქართული ფონტი

გრაფიკოს-დიზაინერმა,  მარიამ საშამ საქართველოს დამოუკიდებლობის დღე მის მიერ შექმნილი ახალი ქართული შრიფტით — MS Pillar -ით მოგვილოცა.  

მარიამი უკვე რამოდენიმე თანამედროვე ქართული შრიფტის ავტორია, რომელთა შეთვალიერებას საიტზეც

შეძლებთ: ლინკი.

MS Pillar სასათაურე შრიფტია, 5 წონით: Thin, Light, Regular, bold, ExtrabBold. 

მოიცავს როგორც ქართულ მხედრულ, ასევე — მთავრულ ანბანს. 

ქართული შრიფტის სივრცე დღეს ნამდვილად საჭიროებს ახალი გამართული შრიფტებით გამდიდრებას. თითოეული პროექტი ღირებულია ქართული ტიპოგრაფიის სფეროსთვის. მარიამი მოგიყვებათ თუ რა პროცესი გაიარა ამ ფონტის შექმნისას:

რა გახდა ამ შრფიტის შექმნის ინსპირაცია?

2017 წელს ვიმუშავრე მსოფლიო რაგბის u20 ვიზუალურ სტილზე. ამ დროს ძალიან მინდოდა სქელი და ვიწრო სტილის ქართული ფონტი მქონოდა, რომელიც საშუალებას მომცემდა, ფონტში ფოტო ჩამესვა ან სხვა მსგავსი მანიპულაცია განმეხორციელებინა. სამწუხაროდ შესაფერისი ფონტი არ არსებობდა და ამ მიმართულებისგან თავის არიდება მომიწია. სწორედ ამ პერიოდში დავიწყე ფონტინჟინერიის სწავლა ჯეოლაბში, სადაც მთელი ჯგუფი კოლექტიურად ვმშაობდით ფონტზე - “GL Gordeziani”, რომელიც შთაგონების მეორე მხარეს წარმოადგენდა.

(2023 წელს MS Pillar პირველად გამოვიყენე რაგბის ევროპის ჩემპიონატის ვიზუალურ სტილში, ხოლო მალევე რაგბის მსოფლიო ჩემპიონატის ვიზუალური სტილისთვის შევქმენი ფონტი MS World Rugby)

როგორი იყო ფონტზე მუშაობის პროცესი? რა ეტაპები გაიარეთ კონცეფციიდან საბოლოო პროდუქტამდე?

MS Pillar-ზე მუშაობის პროცესი წლობით გაიწელა, რადგან ძალიან გამოუცდელი ვიყავი. თავიდან მხოლოდ ერთი წონით, Extra Bold-ით დავიწყე. შემდეგ მივხვდი, რომ თხელი ვერსიებიც მჭირდებოდა. მეგონა, რომ ფორმები მაქსიმალურად უნდა შემემჭიდროებინა, მაგრამ პროცესში აღმოვაჩინე, რომ სიცარიელეები ქმნიან კითხვადობას. მოგვიანებით პოპულარული გახდა გამოკვეთილი ჭრილები, რომელიც შარშან დავამატე. წელს კი დეტალები შევასწორე და ამით დავასრულე.

შრიფტი ეძღვნება საქართველოს დამოუკიდებლობის დღეს — 26 მაისს. როგორ დაუკავშირეთ ეს  მნიშვნელოვანი თარიღი შრიფტის ძირითად კონცეფციას?

სიმართლე გითხრათ ასე არ მიფიქრია. ამ ფონტს 26 მაისს არ ვუკავშირებ, მაგრამ მიყვარს ეროვნული დღესასწაულებზე დიზაინერებისთვის ჩემეული საჩუქრის გაკეთება და თუ მიმდინარე პროექტი მაქვს, ვცდილობ ხოლმე, ჩემს თავს დედლაინი ასეთი დღისთვის დავუწესო.

თქვენი აზრით, რა სახით შეიძლება ამ ფონტის გამოყენება ყველაზე ეფექტურად?

იქიდან გამომდინარე, რომ ქართული სიტყვები საკმაოდ გრძელია, დიზაინერები ხშირად ვდგებით იმ პრობლემის წინაშე, როცა გვინდა ტექსტი ფორმატში კარგად გავჭედოთ, მაგრამ გაბარიტების გამო ბევრი ცარიელი სივრცე გვრჩება, ზოგჯერ კი გვინდა სიტყვამ დიდი ფართობი დაიკავოს, მაგრამ სასურველი სიმაღლით ერთი სიტყვაც არ ეტევა. ასეთი შემთხვევებისთვის MS Pillar-ის სივიწროვე/სიმაღლე მომგებიანია.

რა გამოწვევებს წააწყდით დიზაინის შექმნის პროცესში და როგორ გადალახეთ ისინი? რა სირთულეები აქვს ვიწრო სტილის ქართული შრიფტის შექმნას?

ქართული ასოები ორიგინალ ვერსიაში საკმაოდ მაღალია და განსხვავებები ძირითადად ვერტიკალურადაა განფენილი, ამიტომ ვიწრო სტილი უფრო ადვილი ასაგები გამოდგა, ვიდრე განიერი და დაბალი.

ამ ფონტზე მუშაობისას ყველაზე მეტად გადაწყვეტილების მიღება გამიჭირდა, რა დეტალებში შემენარჩუნებინა კონსისტენტურობა და რაში მიმეცა ასოებისთვის მეტი ინდივიდუალურობა.

გაქვთ თუ არა სხვა შრიფტების პროექტები, რომლებზეც ამჟამად მუშაობთ?

ამ მომენტში კომერციულის გარდა, ორ პირად პროექტზე ვმუშაობ. ერთი MS Ring-ის შვილობილი ვერსიაა, ხოლო მეორე უფრო ნაზი და ფემინური ფონტი.

რომელი ტიპოგრაფიული ტენდენციებით ხართ ამჟამად ყველაზე მეტად დაინტერესებული?

ძირითადად იმ ჟანრით ვინტერესდები, რომლებიც დიზაინში მეტად მჭირდება. ამჟამად ვცდილობ ბუნებრივი კავშირები გავავლო ქართულ შრიფტსა და სერიფს შორის.

როგორია თქვენი სამომავლო გეგმები ტიპოგრაფიის მიმართულებით?


ჯერჯერობით, ჩემი ფონტების უმეტესობა ან პირადი ინიციატივითაა შექმნილი უფასო გამოყენებისთვის, ან კონკრეტული კომპანიის დაკვეთით - ექსკლუზიურად მათთვის. ვინაიდან ფონტზე მუშაობა ძალიან შრომატევადი პროცესია, მსურს ისეთი კომერციული ფონტების შექმნაც, რომლის გამოყენებაც არამხოლოდ ერთ, არამედ ბევრ მომხმარებელს და კომპანიას შეეძლება.

საქართველოში ჯერ კიდევ არ არსებობს მკვეთრად ჩამოყალიბებული ფონტების შეძენის კულტურა, მაგრამ ვფიქრობ, ეს შეიძლება შეიცვალოს. ჩემი სურვილია წვლილი შევიტანო ისეთი ტიპოგრაფიული ბაზრის შექმნაში, რომელიც შრიფტს სრულფასოვან და ღირებულ დიზაინერულ პროდუქტად აღიქვამს.

ლიცენზია და ფონტის გადმოსაწერი რესურსი

MS Pillar-ს აქვს უფასო ლიცენზია და თავისუფლად შეგიძლიათ გამოიყენოთ როგორც პირადი, ასევე კომერციული მიზნებისთვის. 

მისი შეთვალიერება, ტესტირება და გადმოწერა შეგიძლიათ საიტიდან: ლინკი

 Facebook     Instagram 

სტატიის ავტორები: 

მარიამ ჩაჩანიძე

ანიტა ეჯიბია