Google Sans — ᲐᲮᲚᲐ ᲣᲙᲕᲔ ᲦᲘᲐ ᲬᲕᲓᲝᲛᲐᲨᲘᲐ

 

ზოგიერთი დიზაინ-გადაწყვეტილება უეცარი შთაგონებით იბადება. სხვები კი ნელ-ნელა ყალიბდება, ადამიანების საჭიროებებზე მორგებით. Google Sans სწორედ ასეთი პრაქტიკული შრიფტია.

 

დღესდღეობით, Google Sans მსოფლიოში ერთ-ერთი ყველაზე ცნობადი და ფართოდ გამოყენებადი შრიფტია. ის გამოიყენება Google Search-ში, Maps-ში, Wallet-ში, Pixel მოწყობილობებსა და უამრავ „ინტერფეისში“. ფონტს აქვს მსოფლიოს 805 ენის მხარდაჭერა, მათ შორის — ქართულის. 

 

 

 

 

ახლა, შექმნიდან თითქმის ათი წლის შემდეგ, Google Sans-მა ახალ ეტაპს მიაღწია: Google Sans ღია წვდომის შრიფტად იქცა. ეს დიდი ნაბიჯია არა მხოლოდ გლობალურ დონეზე, არამედ განსაკუთრებით მნიშვნელოვანია მცირე ტიპოგრაფიული ეკოსისტემებისთვის, მათ შორის საქართველოსთვის, სადაც პროფესიონალური ტექსტური შრიფტები ჯერ კიდევ მცირე რაოდენობით იქმნება. 

Product Sans — Google Sans-ᲘᲡ ᲬᲘᲜᲐᲛᲝᲠᲑᲔᲓᲘ

 

 

 

 

Google Sans-ის ამბავი 2015 წელს Google-ის ლოგოს რედიზაინით დაიწყო. ახალი იდენტობა თანამედროვე, მეგობრული და გეომეტრიული იყო, თუმცა Google-ს სჭირდებოდა ახალი ლოგოს ჰარმონიზება სხვა ტექსტურ ელემენტებთან, გადაწყვეტილება კი იყო ინდივიდუალური ტიპოგრაფიული სისტემის შექმნა.

 

ამისთვის შეიქმნა Product Sans , Google-ის ლოგოს გეომეტრიული ვიზუალიდან პირდაპირ მიღებული ადაპტირებული შრიფტი. მისი წრიული ფორმები და მცირე დაშორებები შესანიშნავად მუშაობდა დიდი ზომის ტექსტებისა და სათაურებისთვის, Google-ის მრავალი აპლიკაცია დღემდე იყენებს ამ შრიფტს. 

 

 

 

 

თუმცა ეს შრიფტი გათვლილი იყო სათასათაურედ, ტექსტებში მისი გამოყენება არაეფექტური აღმოჩნდა. აშკარა გახდა, რომ Google-ს მრავალფუნქციური შრიფტი სჭირდებოდა. სწორედ ამ საჭიროებიდან გამომდინარე დაიწყო მუშაობა Google Sans-ზე.

 

 

 

Google Sans-ᲘᲡ ᲨᲔᲥᲛᲜᲐ

 

 

Google Sans შეიქმნა 2017 წელს Product Sans-ზე დაყრდნობით.

Colophon Foundry-სთან თანამშრომლობით, დიზაინის გუნდმა დახვეწა ასოების ფორმების ყველა ასპექტი: შტრიხის სისქე, დაბოლოები, პროპორციები, x-სიმაღლე, ზედატანები და ქვედატანები. მიზანი იყო მკაფიო კითხვადობის მიღწევა ხასიათის დაკარგვის გარეშე.

 

 

 

 

Google Sans ბრენდის მთავარი ხმა გახდა — საკმარისად მოქნილი ინტერფეისებისთვის და საკმარისად აქცენტური ბილბორდებისთვის.

 

 

Google Sans-ᲘᲡ ᲕᲐᲠᲘᲐᲜᲢᲔᲑᲘ

 

 

მოგვიანებით, 2020 წელს შეიქმნა Google Sans Text, ტექსტური ფონტი, რომელიც კიდევ უფრო დახვეწილი ვარიანტია. სიმბოლოები უფრო მაღალი და ნაკლებად მრგვალი აქვს, რაც უფრო მეტად აუმჯობესებს წვრილად დაწერილი ტექსტის კითხვადობას. 

 

 

 

 

Google Sans Flex — არის ვარიაციული შრიფტი (Variable Font), რომელსაც აქვს 6 ღერძი: წონა, სიგანე, ოპტიკური ზომა, დახრილობა, ხარისხი და მომრგვალება. ეს საინტერესო იქნება დიზაინერებისთვის, რადგან ინტერფეისები სულ უფრო დინამიური ხდება. ვარიაციული ტექნოლოგიის შრიფტები აცოცხლებს ტექსტს და ამრავალფეროვნებს მომხმარებლის გამოცდილებას.

 

 

Google Sans Mono — 2020 წელს შეიქმნა ისეთი ტექსტებისთვის, რომლებიც მონოგანივ – ფიქსირებული სიგანის სიმბოლოებს საჭიროებდა (ძირითადად კოდირებისთვის). მან მალევე ჩაანაცვლა Roboto Mono Google Chat-ში. 

 

ერთადერთი პრობლემა ის იყო, რომ დეველოპერების მხრიდან უარყოფითი გამოხმაურება მიიღო. ასოების ფორმები მცირე ზომისთვის არ იყო ადაპტირებული, ამიტომ კარგად არ იკითხებოდა. განსაკუთრებით რთული იყო a-სა და o-ს გარჩევა. ეს კი კოდისთვის ძალიან პრობლემურ საკითხად იქცა, რადგან ერთ არასწორად განთავსებულ სიმბოლოსაც კი შეუძლია მთელი პროგრამის გაუმართაობა გამოიწვიოს. 

 

ამან განაპირობა Google Sans Code-ის შექმნა, სპეციალურად პროგრამირებისთვის. 2025 წლიდან ეს ფონტი თავისუფალ წვდომაშია და ამჟამად Gemini-ში კოდის საჩვენებლად გამოიყენება.

 

 

 

 

 

ᲚᲐᲗᲘᲜᲣᲠᲘ ᲤᲝᲜᲢᲘᲡ ᲒᲚᲝᲑᲐᲚᲣᲠ ᲓᲝᲜᲔᲖᲔ ᲒᲐᲤᲐᲠᲗᲝᲔᲑᲐ

 

 

Google-ის პროდუქცია დღეს მთელს მსოფლიოში გამოიყენება სხვადასხვა ენების მფლობელების მიერ. Google Sans-ის მთავარი ფუნქცია ინტერფეისების ერთიან ჰარმონიულ ვიზუალურ სტილში მოქცევა იყო. 

 

საჭირო იყო Google Sans-ის გაფართოება ყველა იმ ენაზე, რომლებზეც Google-ის პროდუქტები გამოიყენება. ეს ნიშნავდა ასობით ათასი ახალი გლიფის ზედმიწევნით დამუშავებას 20-ზე მეტ დამატებით დამწერლობის სისტემაში, რაც გულისხმობდა თანამშრომლობას შრიფტის სტუდიებთან და სპეციალისტებთან მთელი მსოფლიოდან, რომლებიც იცნობდნენ თითოეული დამწერლობის კომპლექსურ მოთხოვნებს. 

 

 

 

 

საერთო ჯამში, ფონტს აქვს მსოფლიოს 805 ენის მხარდაჭერა, მათ შორის — ქართულის, რაც Google Sans-ს მსოფლიოში ერთ-ერთ უდიდეს შრიფტების ოჯახად აქცევს.

 

 

 

 

ქართული ნაწილის დიზაინის ავტორია აკაკი რაზმაზე, წამყვანი შრიფტის დიზაინერი, რომელმაც არაერთი მნიშვნელოვანი ტექსტური შრიფტის ქართულ ნაწილზე იმუშავა, რომლებსაც აქტიურად ვიყენებთ და ვხვდებით ყოველდღიურად: FiraGo, Noto Sans Georgian, Noto Serif Georgian, TBC Contractica,  Helvetica Neue, FF Meta, Neue Frutiger,  და ა.შ.

 

 

 

 

 

"Google Sans-ის ქართულს ვერსიას აქვს 3 ძირითადი მიმართულება, სასათაურე ვერსია, სატექსტო ვერსია და მათი იტალიკ ვერსიები. ბუნებრივია შრიფტს აქვს წონის სხვადასხვა ვერსიებიც. ეს იშვიათი შემთხვევაა როცა ქართული შრიფტი მოიცავს ოპტიკურ ზომებს. ეს იმას ნიშნავს, რომ სხვადასხვა სიტუაციაში შრიფტი იმისდა მიხედვით შეგვიძლია ვცვალოთ, თუ რა ზომაზე გვჭირდება ტექსტის დაწერა. პატარა ზომებში შესაძლებელია Text ვერსიის გამოყენება, რომელიც შრიფტის ძირითად დიზაინს იმეორებს, მაგრამ არის მეტად კითხვადი და ადვილად აღქმადი."

აკაკი რაზმაძე

 

 

ᲠᲐᲢᲝᲛ ᲐᲠᲘᲡ ᲦᲘᲐ ᲬᲕᲓᲝᲛᲘᲡ ᲢᲔᲥᲡᲢᲣᲠᲘ ᲤᲝᲜᲢᲔᲑᲘ ᲛᲜᲘᲨᲕᲜᲔᲚᲝᲕᲐᲜᲘ ᲡᲐᲥᲐᲠᲗᲕᲔᲚᲝᲡᲗᲕᲘᲡ

 

 

საქართველო საკმაოდ მდიდარი ტიპოგრაფიული მემკვიდრეობის მქონე ქვეყანაა, თუმცა ძალიან ცოტა პროფესიონალური, თანამედროვე, მაღალი ხარისხის ტექსტური შრიფტია, რომლებიც თავისუფალ წვდომაშია მომხმარებლებისთვის. 

 

Google Sans-ის თავისუფალი წვდომის შემოთავაზებით Google-ს მიზანა შექმნას ერთიანი და დახვეწილი ციფრული გარემო. ის სთავაზობს დიზაინერებს გამოიყენონ ფონტი თავიანთ ინტერფეისებში, რაც შექმნის უფრო მკაფიო და კომფორტულ პროდუქტს მომხმარებლებისთვის, რომელ ქვეყანაშიც არ უნდა მოიხმარდნენ ისინი ტექნოლოგიას.

 

 

 

 

Google Sans შეგიძლიათ ჩამოტვირთოთ Google Fonts-დან: ლინკი

 

ლიცენზია: Open Font License (უფასოა როგორც პირადი, ასევე კომერციული სახით გამოყენებისთვის)

ვიზუალური მასალის წყარო: ლინკი

 

სტატიის ავტორი: 

 

 

   მარიამ ჩაჩანიძე

 

 

 Facebook     Instagram