Antena - მათე ხარჩილავას ახალი ფონტი ინოვაციური დიზაინით

 

ქართულ ტიპოგრაფიაში საინტერესო პერიოდი დგას: დიზაინერები სულ უფრო აქტიურად ქმნიან თანამედროვე, ტექნოლოგიურად მდიდარ შრიფტებს, რომლებიც არა მხოლოდ ესთეტიკურად მიმზიდველია, არამედ ფუნქციურადაც მრავალფეროვანი. 

 

 

 

 

მათ შორის, ერთ-ერთი ახალი მაგალითია 123 Antena — მაღალი, ვიწრო, ძალიან დახვეილი სასათაურე შრიფტი, რომელიც თანამედროვე დიზაინს კარგად ეხმიანება. ავტორია ახალგაზრდა ქართველი შრიფტის დიზაინერი მათე ხარჩილავა.

 

Antena პირველ რიგში გამოირჩევა აქცენტური ვიზუალური ფორმით: ეს არის ვიწრო და მაღალი სასათაურე სტილი, რომელიც განსაკუთრებით ეფექტურად გააფორმებს პლაკატებს, ბანერებს, სოციალური მედიის ვიზუალებსა და ყველანაირი სახის დიზაინს, სადაც საჭიროა ენერგიული, მკაფიო და ეფექტური ვიზუალი. 

 

 

 

 

მისი ფორმები მკვეთრი, სტრუქტურულად სუფთა და თანამედროვეა, რაც შრიფტს უნივერსალურობასა და მრავალ ფუნქციურ სიტუაციაში ადაპტირებადობის შესაძლებლობას ანიჭებს.

 

სიმბოლოებს აქვთ მკვეთრად გამოხატული გეომეტრიული „მელნის მახეები“, რისი საშუალებითაც იქცევა ნებისმიერი დიზაინის თანამედროვე ელემეტად. 

 

 

 

 

ფონტს აქვს 7 წონა, ასევე ვარიაციული ფონტის ტექნოლოგია. 

 

 

 

 

Variable ᲢᲔᲥᲜᲝᲚᲝᲒᲘᲐ ᲥᲐᲠᲗᲣᲚ ᲨᲠᲘᲤᲢᲔᲑᲨᲘ

 

Antena-ს განსაკუთრებულობას მისი ვარიაციული ვერსია განაპირობებს. შრიფტი მოიცავს:

 

• წონის ვარიაციას — thin-დან bold-მდე

• მარჯვენა დახრის ვარიაციას

• მარცხენა დახრის ვარიაციას

 

 

ვარიაციული შრიფტები ჯერ კიდევ ფეხს იკიდებს ქართული დიზაინის ინდუსტრიაში. ეს გულისხმობს ფუნქციას, რომელიც საშუალებას გაძლევთ არა მხოლოდ კონკრეტული წონები და სტილები აარჩიოთ დიზაინისთვის, არამედ მათი შუალედური ვარიანტებიც. 

 

 

 

 

მიუხედავად იმისა, რომ ტექნოლოგია უკვე წლებია აქტიურად გამოიყენება ლათინურ ფონტებში, ქართულ შრიფტებში მისი დანერგვა ჯერ კიდევ ახალი და ნოვატორული ნაბიჯია.

 

Antena ამ მიმართულებით ერთ-ერთი გამორჩეული მაგალითია — ის დიზაინერებს აძლევს თავისუფლებას ექსპერიმენტებისთვის, ფონტებისთვის მოძრაობის, რიტმის და დინამიკის მისაცემად. 

 

 

 

 

ამასთან, ეს კარგი საშუალებაა იმისთვის, რომ რამოდენიმე წონის შექმნით დაგენერირდეს უამრავი შუალედური წონის ვარიანტი, რაც მნიშვნელოვნად გაამდიდრებს ქართული შრიფტის კულტურას.

 

 

ᲛᲐᲠᲪᲮᲔᲜᲐᲛᲮᲠᲘᲕᲘ ᲓᲐᲮᲠᲐ — ᲐᲮᲐᲚᲘ ᲛᲝᲕᲚᲔᲜᲐ ᲥᲐᲠᲗᲣᲚ ᲢᲘᲞᲝᲒᲠᲐᲤᲘᲐᲨᲘ

 

 

 

 

როცა საქმე დახრილ ვარიანტებს ეხება, ქართულ ტიპოგრაფიაში კლასიკურად მარჯვნივი დახრილი სტილები გამოიყენებდა და გამოიყენება. მარცხენა დახრა, როგორც სტილური გადაწყვეტილება, 

 

Antena-ს სწორედ ეს უნიკალური სიახლე შემოაქვს — ქმნის ახალ ვიზუალურ შესაძლებლობებს, ახალ ემოციას და ახალ გადმოცემის მარნერას სათაურების გასაფორმებლად.

 

 

 

 

ეს გადაწყვეტილება კარგი მაგალითია, როგორ შეგვიძლია ქართული დიზაინის სფეროს გაფართოება და ახალი ვიზუალური სტილებით გამდიდრება ექსპერიმენტალური მიდგომების საშუალებით. რასაც შეიძლება მომავალში ქართული ტიპოგრაფიის ახალი მიმართულების ჩამოყალიბებაც მოჰყვეს.

 

ფონტის შესახებ უფრო ვრცლად მისი ავტორი, მათე ხარჩილავა გიამბობთ: 

 

 

1. როგორ დაიბადა Antena-ს იდეა? რა იყო მისი შექმნის მთავარი მოტივაცია?

 

ანტენას იდეა ჯერ კიდევ 2023 წელს დაიბადა. მაშინ პირადად მჭირდებოდა ქართული ქონდენსდ სტილის ფონტი, თუმცა ქართულ ინდუსტრიაში შესაბამის ალტერნატივას ვერ ვპოულობდი. სწორედ ამან გააჩინა სურვილი, რომ თავად შემექმნა მსგავსი სტილის ფონტი

 

 

2. რატომ აარჩიე მაღალი და ვიწრო სტილი? რა პრობლემას ან საჭიროებას ეხმიანებოდა ეს ფორმა?

 

მაღალი და ვიწრო სტილის შექმნა საინტერესო სამუშაოა  მას საკუთარი გამოწვევები და შეზღუდვები აქვს, რაც პროცესს კიდევ უფრო საინტერესოს ხდის. თუმცა ძირითადი მიზეზი მაინც ის იყო, რომ ქართულ სივრცეში ამ მიმართულების ფონტები თითქმის არ არსებობდა. თან პირადადაც ძალიან მომწონს მსგავსი სტილის ესთეტიკა

 

 

 

 

3. ვარიაციული შრიფტის შექმნა საკმაოდ რთული ტექნიკური პროცესია. რა გამოწვევები გქონდა ამ მიმართულებით?

 

ალბათ მთავარი გამოწვევა ვარიაციული შრიფტის შექმნა იყო. პირველივე შეხება შრიფტის დიზაინთან მინდოდა მაქსიმალურად საინტერესო ყოფილიყო, ამიტომ გადავწყვიტე ფონტს დიდი ოჯახი ჰქონოდა ამან პროცესიც უფრო საინტერესოდ აქცია.

ვარიაციული შრიფტის შექმნა საკმაოდ გრძელვადიანი სამუშაოა: უამრავი დეტალია გასათვალისწინებელი, რათა ინტერპოლაციის პრობლემები არ წარმოიქმნას და შრიფტის ყველა სტილი გამართული იყოს

 

 

4. როგორ გაჩნდა მარცხნივ დახრილი სტილის შემოტანის იდეა? 

 

ქართულ ფონტებში მარცხნივ დახრილი სტილი ჯერ არ შემხვედრია. ვფიქრობ, ქონდენსდ ფონტს უხდება და რეალურ გამოყენებაშიც ეფექტური იქნება,. ამიტომ გადავწყვიტე, რომ საინტერესო იქნებოდა.

 

 

5. რა იყო ყველაზე რთული ნაწილი Antena-ს დიზაინში — ვიზუალური სტილის შემუშავება, ტექნიკური მხარე თუ სხვა რამ?

 

ანტენას დიზაინში ყველაზე გამოწვევადი ალბათ დიდი ოჯახის შექმნა იყო. ვიზუალურ მხარესთან ერთად ბევრია ტექნიკური დეტალია, რაც საჭიროა ფონტის სწორად და გამართულად მუშაობისთვის. შესაბამისად, ყველა ამ ელემენტის გათვალისწინება და ზუსტი გათვლა საკმაოდ შრომატევადი პროცესია

 

 

 

 

6. როგორ გესახება Antena-ს გამოყენება — სად და როგორ შეიძლება ის საუკეთესო სახით ინტეგრირდეს დიზაინში?

 

ანტენა სასათაურო ფონტია. ვიწრო და ძლიერი სტილით გამოირჩევა და განსაკუთრებით კარგი ჩანს, როცა გინდა რაიმე გამორჩეული ყურადღების მიმქცევი იყოს

 

 

7. როგორ ეხმიანება Antena ქართული წერითი ტრადიციის ფორმებს და რა აქვს სრულიად ახალი?

 

ანტენა უფრო თანამედროვე ფორმებისკენ მიდის. მას აქვს ინქ ტრეპები, რაც განსაკუთრებულ ხასიათსა და ვიზუალს სძენს, თუმცა ითვალისწინებს ყველა სტანდარტს, რაც ქართულ ტრადიციებს ახასიათებს

 

 

 

8. რას ურჩევდი დიზაინერებს, რომლებსაც სურთ ისეთი თანამედროვე ტექნოლოგიის გამოყენება თავიანთ პროექტებში, როგორიცაა ვარიაციული შრიფტის ტექნოლოგია?

 

ვარიაციული ფონტის შექმნა საინტერესო პროცესია. ვფიქრობ, თავად პროცესი ძალიან მოეწონებათ, უშუალოდ პროცეი სავსეა გამოწვევებით, თუმცა საბოლოო შედეგი ნამდვილად ღირს შრომად.

 

 

ᲚᲘᲪᲔᲜᲖᲘᲐ: 

 

ფონტი უფასოა როგორც პირადი, ასევე კომერციული სახით გამოყენებისთვის.

 

 

ᲤᲝᲜᲢᲘᲡ ᲒᲐᲓᲛᲝᲬᲔᲠᲐ ᲨᲔᲒᲘᲫᲚᲘᲐᲗ: ლინკი.

 

 

 

სტატიის ავტორი: 

 

 

   მარიამ ჩაჩანიძე

 

 

 Facebook     Instagram